De Presidintes
Trije froulju ha it oer de problemen en mislearringen fan it libben. De hypokrisy fan de Eastenrykse nei oarlogse maatskippij en de bekrompen boargerlikheid wurde útpluze mei bittere humor en eigensinnish taalgebrûk.
De ynbylde sike
De man is in ferbiten hypokonder, dy’t ûnder lieding fan in soad dokters en apotekers syn libben ferslyt op syn ‘siikbêd’. Op in dei beslút hy dat it tiid wurdt dat syn dochter trouwen giet. Yn ferbân mei syn sabeare syktes liket it him tige noflik om in dokter te hawwen as skoansoan, derhalve regelet hy dat. Syn dochter is hjir net fan sjarmearre, hja is al fereale op in oarenien. De heit lykwols jout syn dochter in kar-út: of trouwe, of it kleaster yn. Op in stuit spanne de broer fan de man en it tsjinstfamke gear en betinke in komplot tsjin de man om èn de plande brulloft tsjin te hâlden èn de frou, dy’t allinne om it jild by him bliuwt, te ûntmaskerjen. Kommintaar: In op en top komeedzje mei alle yngrediïnten. It is skreaun yn de 17de ieu, mei oare wurden, in grut tal teksten binne net mear fan dizze tiid, dat kin in neidiel wêze mar foeget wol in ekstra diminsje ta oan dit stik. Der wurdt in soad mei teksten boarte, bytiden rinne hja troch elkoar hinne en bytiden rinne hja lâns elkoar hinne. Dêrtroch is it gjin maklike komeedzje, mar as it slagget dan is it in súkses
Folk yn
It bûten Squire Grange is sawol in ein út de reek as op in freedsume manier in deade boel.
Sir Malcolm is drok dwaande mei neat dwaan en Lady Amelia is tegearre mei húsfreon Freddy wanhopich op syk nei in plot foar har nije skriller.
As de ûngelokkige Vic Tim del komt en eins daliks troch in ûnbekende delsketten wurd, probearret eltsenien de dieder te ûntdekken foardat ‘r wer taslaan kin. It earste probleem is hoe it lichem fan it poadium ôf te krijen, it jout in soad rotsoai en de spiler moat yn ’t twadde bedriuw yn in dûbelrol as plysjeman meidwaan.
De húsfeint Smalls en Mabel de tsjinstfaam dogge harren best om de plysje te helpen en Sir Malcolm helpt de moaie Nunnal graach in hantsje, mar se kinne net foarkomme dat ek de toanielprodusint fermoarde wurd. Efkes wurdt der tocht dat ek it publyk fergif hân hat!
Sa as by Agatha Christie komt in âldere frou, Miss Marbles, om de saak op te lossen. Eintsje beslút liket it derop dat de ynstekker de dieder is. Of is der noch in fertochte, want sels nei ôfrin falle der noch deaden.
Dizze healwize komeedzje wegert perfoarst harsels, it sjenre, de auteur en de spilers al te serieus te nimmen en is oant no ta in boppeslach yn Ingelân; Australië; Súd Afrika en Amerika.
Nederlân en België folgje?
Freonskip, leafde en bruorskip (Hotel de Botel)
Janus hat syn kafee yn Amsterdam ferkocht. De buert wie de buert net mear en hy wie oan wat oars ta. Hy begjint in kamping oan de Noardsee. Kamping ‘Hotel de Botel’. Syn trouwe maat Robby ferhuzet mei en ek de fêste klanten litte him net yn ‘e steek. Joop en Annie, Drikus en syn Truus en ek beppe komme te útfanhûzjen op ‘e kamping. Allegear helpe se mei om der in sukses fan te meitsjen. Mar wêr is Fleur? Sûnder har is neat itselde en seker Janus net. Fleur wennet yn Spanje. Tegearre mei Beppe betinkt Robby in plan om Fleur safier te krijen om werom te kommen. Mar oft dat plan no echt sa tûk is ast Nathaly deryn belûkst…
Eije Wykstra
Op de iere en kâlde moarn fan 18 jannewaris 1929 fermoardet Eye Wykstra oané Polmaleane yn Doezum 4 plysjemannen. Hy sjit se del en sneidt se de kiel troch. Oan it libben van Hermannus H. Hoving, Aldert Meijer, Mient van der Molen en Jan Werkman komt folslein ûnferwacht in ein, mar wêrom? Eye slacht al in skoftsje om mei Aaltsje Wobbes – van der Tuin, mem fan 6 jonge bern. Aaltsjes man Hindrik hie in pear hinnen stellen en wurdt feroardiele ta oardel jier Feanhuzen. Aaltsje lit har bern yn’e steek en wol mei Eye har libben diele…mar it rint oars…
Se wurdt oproppen troch de offisier fon justysje foar ferhoar yn Grins: “moedwillige verlating van haar minderjarige kinderen” is de reden. At se net frijwillig meikomt, wurdt se de oare deis troch fjouwer plysjemannen ophelle…. Mei freeslijke gefolgen
Streuper/musikant/klompmakker/foeger Eye hie in grutte hekel oan gesach en hy leaude yn spoeken en geasten en ferdjippe him yn grutte filosofyske wurken en skreua skiednis mei syn net goed te praten moardzjen…. Syn freeslike died en it werom derfan is yn de rin fan de jierren al op in hiel soad wizen ferteld en ynterpreteard. …. Sa no ek wer: Eye Wykstra, in téatrale ynterpretaasje.
De ynbylde sike
De man is in ferbiten hypokonder, dy’t ûnder lieding fan in soad dokters en apotekers syn libben ferslyt op syn ‘siikbêd’. Op in dei beslút hy dat it tiid wurdt dat syn dochter trouwen giet. Yn ferbân
mei syn sabeare syktes liket it him tige noflik om in dokter te hawwen as skoansoan, derhalve regelet hy dat. Syn dochter is hjir net fan sjarmearre, hja is al fereale op in oarenien.
De heit lykwols jout syn dochter in kar-út: of trouwe, of it kleaster yn.
Op in stuit spanne de broer fan de man en it tsjinstfamke gear en betinke in komplot tsjin de man om èn de plande brulloft tsjin te hâlden èn de frou, dy’t allinne om it jild by him bliuwt, te ûntmaskerjen.
Kommintaar:
In op en top komeedzje mei alle yngrediïnten. It is skreaun yn de 17de ieu, mei oare wurden, in grut tal teksten binne net mear fan dizze tiid, dat kin in neidiel wêze mar foeget wol in ekstra diminsje ta oan dit stik. Der wurdt in soad mei teksten boarte, bytiden rinne hja troch elkoar hinne en bytiden rinne hja lâns elkoar hinne. Dêrtroch is it gjin maklike komeedzje, mar as it slagget dan is it in súkses.
NB Fan dit stik is ek in fryske bewurking fan Alle G. Hof.
DS
Stimmen oan de oare kant
In bûtengewoan spannend spiritueel toanielstik foar ferieningen dy it publyk grizelje litte wolle. It spul begjint yn de achttjinde ieu, wêr inkelde ûngelokkige earme sielen ophongen wurde yn in gerjochtsgebou. Ieuwen letter, yn dizze tiid, is it gerjochtsgebou omboud ta wenhûs. Evalien Verhoeven, in nochtere frou dy`t oant betterjen is fan in skieding, komt mei har suster en dochter yn it hûs wenjen. In searje eangstige barren begjint. Der sweve geasten yn it iuwenâlde pân om en dy ha it op dochter Evie fersjoen. In serieuze thriller wêryn hja gebrûk meitsje kinne fan spannende effekten, dy`t maklik te realisearjen binne. In thriller dy`t sels de meast nochtere minsken ta it ein yn`e besnijing hâldt.
Ferhaal:
Dit spul befettet in apart en orizjineel ferhaal. De earste útkomst spilet him ôf yn de 18e ieu. Wy befine ús yn in rjochtseal. Fjouwer fertochten wurde dêr ta de dea feroardiele. Dit bedriuw is ien en al fertriet en ûnrjochtfeardich. Ek de spikerhurde rjochtspraak út dy tiden sil wiidweidich nei foaren komme. Alhoewol fiksje, leit dit net fier fan de wierheid. Rjochtspraak yn dy dagen wie net te fergelykjen mei wat wy no kenne. Wannear de fjouwer fertochten ophongen wurde, yn dizze selde romte, geane wy fierder mei it twadde bedriuw fan dit toanielstik. Yn it twadde bedriuw meitsje wy in tiidsferrin nei hjoed de dei. Wy befine ús yn itselde gebou. No gjin gerjochtsgebou mear, mar omboud ta in wenhûs. De bewenners ha gjin flau benul fan de ferskriklike tafrielen dy him hûnderten jierren lyn yn harren húskeamer ôfspile ha. It wurdt ús subtyl en stadich dúdlik dat der wat net yn`e heak is. Evie, de dochter, kriget regelmjittich besite op har sliepkeamer. Se praat mei de ferstoarne minsken dy yn har hûs terjochte steld binne. Evie wurdt net begrepen en har mem is bang dat se gek wurden is. Uteinlik skeakelt se dochs help fan in parapsycholooch yn. Oft hy yn steat is om te begripen wat de omdoarmjende geasten wolle, is noch mar de fraach. Wa begrypt de; Stimmen oan`e oare kant?
In spul dat it begryp “ spûkferhaal” in oare draaiïng jaan sil. Lykas earder beskreaun. Men is yn steat om mei dit spul it publyk grizelje te litten.
Sfear setting:
De sfear moat yn it earste bedriuw oars wêze, as yn it twadde en tredde bedriuw. It earste bedriuw is nammentlik it begjin, de kearn fan dit ferhaal. Wy witte no dat it wenhûs ienris in rjochtbank west is, wêr de ferskriklike foltere en eksekúsjes plak fûnen. Wichtich: Yn it earste bedriuw is de romte in rjochtseal, en letter wurdt dit in wenhûs yn it twadde bedriuw. Hja meie sjen dat de keamer troch de rin der iuwen feroare is. Echter moatte der wol kearnpunten bliuwe, dy yn de 18e ieu en op dit stuit noch altyd itselde binne. Bygelyks in nis yn de muorre of in sierlist dy`t der altyd al hongen hat. Dat is nammentlik de magy fan dit toanielstik: Wat barde der doe en wat bart der no, yn dizze selde romte. It publyk is ommers de iennichste dy ’t tsjûge west is fan de ferskrikkingen dy plak fûnen yn de 18e ieu. De spilers dy it gesin Verhoeven spylje witte net dat harren húskeamer iuwen lyn in rjochtseal wie. Dit makket de situaasje spannend en bizar
Op bêd? Mei sa’n portret?
Liesbeth van Tilburg, in skieden jonge frou besiket mei wikseljend sukses in Bêd en Brochje oan see te behearen. Paul, har eardere peetomke, stipet har út en troch dêrby. Op in dei komt hy mei in apart ferhaal, dat mei ien klap in ein meitsje kinne soe oan har finansjele problemen. As hja troud mei – de foar har folsleine frjemde – Freek Wagemakers, sille sy en hy erfgenamt wurde fan in hiele protte jild.
Liesbeth is nettsjinsteande dochs wol hiel nijsgjirrich nei de ûnbekende houlikskandidaat…..Wannear hy as gast nei har B en B komt, kriget se de kâns him kennen te learen. Om sels dêrby op de eftergrûn te bliuwen, betinkt se in nuodlike list.
Dêrneist hat se noch te krijen mei in aardige, mar trochloaie ynwenjende neef, en in net te snoade helpke, frjemde buorren en op in stuit ek mei de twa ferskate susters fan de mooglike brêgeman.
Hoe giet se dêr mei om?
It Crusoë kwartet
Earne healwei de reis, fergiet midden op de Stille Oseaan “De Simmerstream”, it meast lúksueuze cruiseskip fan de wrâld. De oare moarns betiid spiele fjouwer misken oan op in lyts ûnbewenne eilantsje. Sa’t it liket binne sy de iennichste oerlibjenden fan de ramp.
De fraach is no:sille sy ek it ferbliuw op it eilân oerlibje?
Sin, snoad en swierte
Alex is op jild út en hy hat foar syn baas Frank in kompjûterprogramma ûntwikkele. Omdat dizze ûnsympatike fint de opbringsten hjirfan foar himsels hâlde wol, besiket hy syn freondinne Rian foar syn karke te spannen. Mar omdat Rian de dochter is fan baas Frank, jout dat grutte problemen. Dêrom betinkt Alex in pear listen om syn doel te berikken. Lestich foar him is dat de keunstskilder Ivo, dy’t in portret makket fan Rian, smoar fereale wurdt op syn model. Komme noch by; Floor, de keapsike frou fan de hast fallite Frank, de ûnbetroubere help, de ynklauwerige Loes mei har geheim en Thea, dy simpele mar o sa tûke help yn de húshâlding fan Frank en Floor en it resept is klear om elkoar it libben behoarlik lestich te meitsjen. Fansels komt nei alle healwize ferwikkelingen alles op syn poatsjes telâne.
Falske memmeleafde
Leonie Vlek hat it net maklik. Har mem, Cynthia, is in aakliksma dy`t gjin sprankeltsje leafde foar har fielt. Slimmer noch: Cynthia liket sels har tige bêst te dwaan har dochter sa ûngelokkich mooglik te meitsjen. Al sûnt har bernejierren is Leonie it wend om as in slavinne behannele te wurden. Wylst Cynthia as in dwylsinnige besiket om in bestjoersfunksje te bemachtigjen yn it Dames- komitee foar Woldiedigens, siket Leonie wat treast by har freon Paul. Dit ferrint net sûnder wryt of slyt, want Cynthia docht alles om harren leafde te rampoaien. Dan komt der in nije buorfrou yn`e strjitte wenjen. Sy komt op ûnferwachte mominten binnenfallen en siket dúdlik nei WAT. Stadichoan wurdt dúdlik dat Cynthia in tsjuster geheim te ferbergjen hat. Ien ding is wis: Leonie har libben sil nea wer itselde wêze.
De ferkochte breid
De ferkochte breid is in komysk, jûnfoljend stik.
De klassiker fan Arie v/d Lugt, bewurke troch Maurits Keyzer. De tsjinstellingen tusken ryk en earm, kâlde kak en gewoane minsken is dúdlik oanwêzich. Uteinlik giet it om de leafde en it gelok, net allinnich om jild en oansjen.
Freddy Foxtrot
“Dansen bij Janssen”, It stiet op de gevel fan de dûnsskoalle mar der bard op dit momint neat.
Jan, de eigener en dûnsleraar hat syn foet brutsen en dat is syn frou Ellen min nei it sin.
It jild dûnset by har yn de bûse, mar ja wat der net binnen komt kin ek net útjûn wurde.
De oplossing is gau fûn, it bêste toppear fan it Noarden komt om dûnsles te jaan,
allinne ha Jan en Ellen allebeide in oar toppear útnûge.
It toppear fan Ellen ferskynt as earste op de dûnsflier, en se ha der nocht oan.
Hun hannen jokje, de teannen tintelje want sa fanatyk binne dizze mannen, ja mannen.
Dat hienen jim net ferwachte. No, Ellen likemin!
Jan hat ek in echt toppear komme litten, en dat binne se. As earlik sein, dat wienen se… fyftich jier lyn. Want no sit alles wat fêst ruske.
Moatte dizze twa antikers de dûnsskoalle dan rêde??? Nettsjinsteande dat alles piepet en kreaket tinke se dat se noch hiel wat binne. Mar ja, as jo neist jo skuon rinne, krije jo smoarge sokken!
It is maklik dûnsjen op in oar syn flier, mar dizze beide pearen geane folslein út de maat.
Hoe dit no fierder moat, en as hjir ea noch wer muzyk yn dizze dûnsskoalle komt……….
Lit mar hingje!
It rint sa as it rint, ek al rint it út de hân. Sa giet it al jierren mei it kafee fan Oene en Anneke. Harren kafee yn de Pein begjint in âld stofnêst te wurden en hat net in soad oanrin mear. De iennige klant dy’t se noch hawwe, dêr wurde se net ryk fan. Lolle fynt bier dat hy om ‘e nocht kriget fierwei it lekkerste en hy hat dan ek noch nea in
reade sint betelle. Mar ja fan in keale hin kinne jo ek net plukke fansels. Oene lit de moedfearren dan ek al hingje. Dochs komt der gâns wat flecht op ‘e koai. Earst
komt der in famke dy’t in keammerke hiere wol. Op it earste gesicht soenen jo sizze: Hjir bestiet yn ‘e hiele wrâld gjin twadde fan, sa nuver en sa ûnnoazel. Mar wat kinne jo jo dochs yn minsken fersinne want sy blykt ek noch sa’n suske te hawwen. Jo hawwe it noch nea sa frjemd sjoen. Apen kinne jo fan alles wol leare, mar dizze beide?? It wurd noch healwizer as der in wat útdaagjend frommeske oer de flier komt. Sy blykt fertsjintwurdiger te wezen fan de Unisex masine. De Unisex is spesjaal op ‘e merke brocht foar manlju, sadat dizze de froulju it wurk út hannen nimme kinne. De reek komt Oene en Lolle út de earen as se dit hearre. Tsja dizze beide skiep steane fansels ek al jierren te fretten fan it selde stikje lân. Dit lied fansels ta in ûnmooglike situaasje, dat kinne je wol begripe. Mar ynienen stiet skoanmem nei 10 jier wer op ‘e stoepe. Se blykt in bekstik te wêzen, dy’t grutte heibel yn it kafee makket. Se easket op koarte termyn fiiftûzen Euro werom foar in saneamde houliksreis mei har Frânsman. Dit is in stumper dy’t folslein by har ûnder plak it sit. Mei de help fan linke Leo (in echte hús, tún en keuken krimineel) besykje se skoanmem der ûnder te krijen mar dat slagget fuort net. Drank, slieppillen, laksearmiddel, rolmopsen, neat skynt tsjin har te wurkjen. Se moatte foarsichtich te wurk gean omdat plysje Walter Hibma regelmjittich binnen rint, al hawwe se foar dy knoffelkont net sa folle te freezjen. Dochs binne se oan it ein fan de rit dy âld fekke te snoad ôf mar hoe…
De belle, de belle
As sportlearaar Jip Wiegant tinkt dat hy in goed idee hat, heart hy yn syn holle in beltsje rinkeljen. Hy docht dan in soarte Indianedûns en ropt: De Belle. De Belle. Yn dit blijspul docht hy dat faak. Hy kriget ommers mei faasje mei nuver problemen te krijen wêrfoar hy like nuvere oplossingen betinkt. Ta ûntsetting fan elkenien dy`t der by belutsen rekket. It earste probleem ûntstiet as Jip syn oansteande skoanheit, Neutje, yn in grêft springt, omdat hy tinkt dat hy troch syn strange dochter Myléne op dronkenskip betrape wurde sil. Jip en syn âlde skoalfreon Klo, in begjinnende psychoterapeut, nimme Neutje mei nei it hûs fan Klo om dêr drûge klean oan te lûken.
It toanielstik begjint as it span de sprekkeamer fan Klo ynkomt. Alle trije binne harren oant ferklaaien as Yvonne Meslier der ynkomt, de assistinte en ferloofde fan Klo. Sadree se Jip sjocht, wurdt se lilk. Sy en Jip binne ferloofd west. Sy hat de ferloving ferbrutsen, nei`t Jip har oerhelle hie ta in frijpartij yn in gymnastykseal wêr`t se troch Yvonne`s muoike betrape waarden. Sy tinkt dat Jip har noch altyd efterfolget en dat hy har mei in ferlechje oan Klo optwongen hat. Yn har lilkens smyt se Jip seis Sineeske komkes nei de holle. Neffens Klo binne dat kostbere stikken antyk dy`t hy fan syn mem lient hat. De skatte skea: tweintichtûzen euro. It slimste is dat Klo syn mem, Linda, de komkes meikoarten wer ophelje sil. Sy en Klo hawwe bargebiten. Se seit gjin wurd mear tsjin him. Jip fynt in oplossing foar it probleem. Hy hat fan Myléne tweintichtûzen euro krigen om harren houliksreis te beteljen. Dy lient hy oan Klo om oare komkes te keapjen. Syn houliksreis is pas oer trije moanne yn dizze tiid moat Klo as psychoterapeut sa`n bedrach wol fertsjinje kinne. Neutje seit dat hy de brutsen komkes wol reparearje sil mar Jip set syn plan troch. Neutje hat ek in idee; hy giet nei syn dochter, Myléne fertelle dat hy him troch Klo foar syn dronkenskip behannelje lit. Spitich blykt Jip syn plan yn it wetter te fallen as blykt dat Klo fan kjellens syn stim kwyt rekke is. Hy sil foar in lange tiid gjin pasjinten behannelje kinne. Mar wer hat Jip in oplossing: hy sil, mei masker, Klo syn plak ynnimme en de pasjinten neffens Klo syn skriftlike oanwizingen fan harren problemen ôf helpe. Wilens is Neutje syn nije freondinne oankommen: Linda ten Havezate, de mem fan Klo. Dat lêste wit nimmen, útsein Klo, mar dy kin net prate. Linda sels makket ek nimmen wizer en negearret Klo hielendal. De oare moarn behannelet Jip neffens plan Klo syn earste pasjint: in man dy`t tinkt dat hy in hûn is. Jip docht dat mei sukses, mar op sa`n frjemde wize dat hy der gjin jild foar kriget. De oare saneamde pasjint is Neutje. Jip moat krekt dwaan as of hy Neutje echt behannelet, want Myléne is mei har heit meikommen. Trochdat Jip him ferpraat, ûntmaskeret Myléne him al gau. Sy wurdt poerlilk, en lêst Jip it mannewaar op, mar soarget der ek foar dat Klo wer prate kin. No blykt ek dat Linda Klo syn mem is. Sels wurdt Myléne nuet makke troch Yvonne dy op it lêst dochs wer de kant fan Jip kiest. Linda ferteld dat de brutsen Sineeske komkes goedkeape neimakke antyk wiene en Myléne keapet echte antike Sineeske komkes foar fiif en tweintichtûzen euro. Linda helpt Neutje fan syn drankproblemen ôf. Klo en Myléne reitsje fereale op elkoar en Jip en Yvonne foarmje wer in spantsje. Op it lêst kriget Jip syn lêste bel idee; hy lit it doek ticht gean.
Problemen……..As Jip yn syn holle in beltsje rinkeljen heart, hat hy foar elk probleem in hiel bysûndere oplossing. Utsein foar de wurge kaken fan it publyk yn`e seal.
Hyt ûnder de fuotten
Jo nimme in cruise skip , neame it de Fleurige Flipper en sette der twa fleurige helpen op sa as John en Dick. Derby sette jo alderlei frjemde gasten op it skip en jo ha in
hilarysk ferhaal. Wat as in earsterangs boer ( Bokke ) mei syn simpele soan ( Gaatse ) yn de kunde komme mei in wat apart frommes ( Tryn ) dy’t harren seit wer it op stiet , stiet by de mannen it hier rjochtop yn ‘e nekke. Mar as soks no komt fan lilkens as fan wat oars… wa sil it sizze? Wat soe der barre as der in jong steltsje mei harren beiden oan boat komme, teminsten dat tinke se. Sawol Gerjan, profesjoneel seurpiet, as syn freondinne Ankie krije ûnferwachts besite fan in famyljelid hokker se leaver net op dizze reis tsjinkaam wiene. Mar ek Mirjam, de eks fan , bringt in protte leven op de Fleurige Flipper. Om it spul hielendal klear te meitsje sette jo der ek noch in hiele nuver fûgel op , dy se de hiele reis fleanen sjocht. No dan krije jo in stik wat Suver Nuver is.
Firma list en bedroch
By de bruorren Willem en Tinus Klep stiet alles sa’n bytsje yn it teken fan auto’s. Sa hat Willem al jierren in wat tsjustere autosloperij en Tinus hâld him ek mei fan alles dwaande wat it deiljocht eins net ferdrage kin. No hat der wer in hanneltsje opsetten yn âlde auto’s, mar ja om âlde auto’s oan de man te bringen slagget fuort net . Dêrom hat der ien fan it útstjoerburo komme litten en wat foar ien. Dizze hat it buskrûd net útfûn, lit stean fan de auto. Op it mêd fan auto’s hoege jo de bruorren neat te learen mar froulju binne hiele oare apparaten. Nim no de beide buorfroulju, beiden de simpele kant it neist. Hoe hâlde jo sokken mei in bytsje fatsoen bûten de doar? Dit slagget sowieso net mei Fokje. Fokje is in fleurich jong famke mei it bekje op it goeie plak. Nee, dizze sette jo fuort net op ‘e rem. Om de gaos hielendal kompleet te meitsjen komt der ek noch sa’n eigenwiis Hollânsk frommes te útfanhúzjen. Hoe moatte de manlju harren mei sa’n ien no hâlde en drage? Sjoch as it no auto’s west wiene hiene se it wol witten. Auto’s binne in hiel oar ferhaal, dizze kinne jo altiten noch foar de sloop fuort dwaan, mar froulju…
Houliksfakânsje
Hessel en Geart binne twa skoalmaten en omdat jo se altyd byinoar sjogge hawwe se de bynamme krige fan Siameeske twilling Se binne troud, mar hawwe gjin bern. Hessel is de noflike kant neist, earlik sein is er sa loai as stiel, dit jout in soad argewaasje en it houlik mei Anke komt sa stadichoan yn in krisis telâne. Ek Geart syn houlik mei Klaske kin gjin sprekken lije. Geart is eins altyd in puber bleaun, hy besjocht it libben fan de ljochte kant. Hy hat gjin sittend gat en eins is it mar in frouljusgek. Op útstel fan Hessel en Geart sille de froulju allinne op fakânsje nei Spanje ta, dit soe it houlik o sa goed dwaan kinne sizze de mânlju, mar de wiere reden is, de heren wolle de hannen frij ha foar harren aventoerkes, mar dat ien en oar net flot fan de trie rint docht letter wol bliken. Anke hat nammentlik har mem ree fûn om op Hessel te passen en ûnder it mom fan, dat dy jonge him sa min sels rêde kin komt se sa no en ta lâns om in helpende hân te bieden… Hessel en Geart kinne mar min oer dat gnuven en lang om let krije se it foarelkoar dat skoanmem har ôfjout. Hessel en Geart hawwe einlings en te’n lêsten de hannen frij, mar dan…..komme de froulju thús!!
Wylde Havana
As de âlde autoritêre mynhear Timmer nei in muoisum libben komt te ferstjerren komt er foar’t ljocht as in geastferskining yn in tsjustere romte, nêst syn wenkeamer fan eartiids. Dêr kin er yn alle rêst op syn bern delsjen. As er heard dat de bern ûnder it wekjen syn begraffenis al regele ha ûnder it mom fan: “it mei eins neat kostje “, is hy slim teloarsteld. As er dan ek noch heard dat de erfenis al ferdield wie doe’t er noch libbe, wurdt er poerrazend. Kalmearre troch syn eks-frou (ek in geastferskining) wurdt der weromsjoen op harren rûzich libben fan eartiids. Oan de oare kant litte har bern sjen hoe’t se harren jeugdjierren belibbe ha, ûnderwilens helje se it hûs leech fan de ferstoarne. Stadichoan wurdt it dúdlik wêrom dit gesin sa ûntwoartele wie..Moaie dramatyske mominten en hilaryske scenes wurde sjen litten… In komeedzje mei in laits en in trien, foar in soad minsken o sa werkenber.
De erfenis fan omke Sjors
Hein en Bet ha in kastiel urven fan rike omke Sjors. Mei dochter Loeky, broer Daan en syn frou Dora, sille se harren nije oanwinst yn gebrûk nimme. Allegear royale, grappige folksminsken. Allinnich Loeky rint der wat út. Yn it kastiel treffe se de deftige húsfeint en in húshâldster. En noch in soad oare dingen, heimsinniche, griezeliche dingen, dy’t foaral Daan en Dora de stúpen op it liif jeie. It doocht dêr net yn it kastiel, it spûket dêr. Uteinlik binne it twa oanwaaide gasten, Tanja en Max, dy’t mei help fan Loeky, de boel witte op te lossen. In kluchtige thriller dy’t garant stiet foar in jûn wille.